Dyddiad: Awst 23, 2021
Mae Grŵp Llandrillo Menai (GLLM) wedi penodi READ Construction yng Ngogledd Cymru i adeiladu cyfleuster hyfforddi Gwyddor Chwaraeon newydd sbon ar gampws Coleg Menai yn Llangefni.
Mae'r prosiect modern gwerth £6.3m yn cynnwys neuadd chwaraeon newydd sbon, campfa fawr, cyfleusterau newid, 7 ystafell ddosbarth Gwyddor Chwaraeon, labordai Biometreg Chwaraeon, ystafelloedd staff a storio offer.
Dyfarniad y contract yw'r garreg filltir allweddol ddiweddaraf ar gyfer rhaglen datblygu strategol helaeth y Grŵp ar draws ei ystâd.
Dywedodd Aled Jones-Griffiths, Pennaeth Coleg Menai a Choleg Meirion-Dwyfor: "Mae hwn yn gam mawr arall tuag at greu canolfan addysg a hyfforddiant sy'n bwysig yn rhanbarthol yn Llangefni. Bydd yn dod â buddsoddiad y Grŵp ar y campws hwn i ymhell dros £40m dros y 10 mlynedd diwethaf.
"Bydd y cyfleuster Chwaraeon newydd yn cynnwys technoleg ac offer arloesol ar gyfer monitro perfformiad athletaidd. Bydd yn gyfleuster diguro i fyfyrwyr sy'n cofrestru ar ein rhaglen Chwaraeon a Gwasanaethau Cyhoeddus uchel ei pharch."
Gwnaed y buddsoddiad yn bosibl gyda chymorth Rhaglen Ysgolion a Cholegau'r 21ain Ganrif Llywodraeth Cymru. Roedd darpariaeth Cyngor Sir Ynys Môn o Ffordd Gyswllt Llangefni gwerth £11.4m hefyd yn ffactor sylweddol y tu ôl i benderfyniad Bwrdd Llywodraethu'r Grŵp i fuddsoddi'n helaeth yn Llangefni.
Bydd y gwaith adeiladu yn dechrau ym mis Medi eleni a bydd yn parhau tan yr hydref nesaf, a disgwylir i'r Ganolfan newydd gael ei meddiannu ac agor i'w haddysgu erbyn dechrau 2023.
Dywedodd Richard Heaton, Rheolwr Gyfarwyddwr READ Construction: "Mae Read yn falch iawn o fod yn gweithio gyda GLLM ar y prosiect newydd o'r radd flaenaf hwn. Fel cwmni yng Ngogledd Cymru, rydym wedi ymrwymo i ail-fuddsoddi punt Cymru yn yr economi leol, gan ymgysylltu a chefnogi cwmnïau lleol, ynghyd ag uwchsgilio pobl leol a bod o fudd mawr i gymunedau lleol drwy gydol y contract. Rydym yn edrych ymlaen at gryfhau ymhellach ein perthynas â GLLM y tu hwnt i gyflawni'r prosiect strategol pwysig a mawreddog hwn."
Dywedodd Wyn Thomas, Cyfarwyddwr Prosiectau Strategol: "Rydym yn arbennig o falch bod cwmni o ansawdd uchel yng Ngogledd Cymru unwaith eto wedi ennill contract mawr drwy ein fframwaith caffael cystadleuol GLLM.
"Mae hyn yn golygu bod ein prosiectau datblygu yn parhau i fwydo'r rhwydwaith o isgontractwyr sydd wedi'u lleoli yma yn y rhanbarth, gan gryfhau'r economi ranbarthol trwy sicrhau a chreu swyddi yng Nghymru. Ac fel yn achos ein holl ddatblygiadau, bydd y ganolfan Gwyddor Chwaraeon newydd yn cydymffurfio â safon cynaliadwyedd rhagorol BREEAM."
