Arloesol | Cynaliadwy | Cydweithredol Datrysiadau Adeiladu Wedi'i Optimeiddio
Dyddiad: Ionawr 10, 2025
Cafodd grŵp o 21 o bobl hŷn yr anrheg Nadolig perffaith drwy symud i’w cartrefi newydd yn Nyffryn Clwyd.
Symudodd y tenantiaid hynod falch i'r fflatiau modern, ynni-effeithlon yng nghynllun tai gofal ychwanegol Llys Awelon yn Rhuthun, Grŵp Cynefin, mewn pryd ar gyfer y dathliadau.
Dyma’r cam cyntaf ym mhrosiect ailddatblygu Grŵp Cynefin gwerth £12.2 miliwn, mewn partneriaeth â Chyngor Sir Ddinbych a Llywodraeth Cymru a ddarparodd £7.1 miliwn o’i gronfa Rhaglen Tai Cymdeithasol tuag at y gost gyffredinol. Y contractwr ar gyfer y prosiect mawr hwn yw cwmni lleol o Gymru, Read Construction.
Mae’r datblygiad carbon isel wedi’i ddylunio i ddiwallu anghenion pobl hŷn yn Sir Ddinbych ac mae’n cynnwys 35 o fflatiau un a dwy ystafell wely yn ogystal â’r 21 fflat presennol. Mae'r cynllun wedi cynnwys ardaloedd cymunedol megis gerddi, lolfeydd a bwyty. Bydd yr ail gam i uwchraddio rhan hŷn y cynllun yn cael ei gwblhau yn 2025.
Aeth uwch swyddogion Grŵp Cynefin ag aelodau o Gyngor Sir Ddinbych ar daith dywys o amgylch y cyfleuster.
Dywedodd y Cynghorydd Elen Heaton, Aelod Arweiniol dros Iechyd a Gofal Cymdeithasol, Cyngor Sir Ddinbych:
“Roedd yn bleser pur ymweld â Llys Awelon a gweld beth mae’r ailddatblygiad rhyfeddol hwn wedi’i gyflawni. Mae'r tai modern hyn yn berffaith i ddiwallu anghenion y boblogaeth hŷn yn Sir Ddinbych sy'n flaenoriaeth fawr i'r cyngor. Hoffwn ddiolch i Grŵp Cynefin a Read Construction am y gwaith gwych y maent wedi’i wneud ac roedd gweld tenantiaid yn symud i mewn yn bleser pur.”
Roedd hefyd yn foment falch i Bennaeth Datblygu Grŵp Cynefin, Arwyn Evans. Dywedodd:
“Roedd mynd ag aelodau o Gyngor Sir Ddinbych o amgylch Llys Awelon i weld y cynnyrch gorffenedig yn brofiad gwych. Maent yn bartneriaid cefnogol iawn yn y prosiect hwn, fel y bu'r holl bartneriaid a gymerodd ran. Roedd bob amser yn mynd i fod yn adeilad cymhleth, gyda llawer o ystyriaeth.
Mae’r cwmni adeiladu, Read, wedi bod yn wych yn cydweithio â staff Grŵp Cynefin ac yn ymgysylltu â phreswylwyr presennol a oedd yn byw ar y safle yn ystod y gwaith. Mae'n wych gweld y tenantiaid mor hapus yn eu fflatiau newydd, ac i fod yn dathlu'r Nadolig mewn amgylchedd mor braf. Yn 2025 bydd ail gam y prosiect, i uwchraddio rhan hŷn y cynllun.
Hoffwn ddiolch i bawb sy’n ymwneud â’r prosiect hwn, o fewn Grŵp Cynefin a’n partneriaid yng Nghyngor Sir Ddinbych a Llywodraeth Cymru am y cydweithio cadarnhaol sydd wedi ein helpu i greu rhywbeth mor arbennig.”
Mae'r gymuned ehangach yn Rhuthun hefyd wedi elwa o'r prosiect. Cynigiodd cwmni adeiladu Read £18,000 mewn grantiau i grwpiau a chlybiau lleol i wella bywydau pobl sy'n byw yn yr ardal.
Dywedodd Alex Read, Cyfarwyddwr Read Construction:
“Mae Read Construction yn falch o fod yn rhan o’r prosiect hwn a’r ffordd y mae’r holl bartneriaid yn ei gychwyn, dylunio ac adeiladu yn cydweithio i ddarparu cyfleuster preswyl o ansawdd uchel. Bydd y llety gofal ychwanegol gorffenedig yn darparu fflatiau modern o ansawdd uchel sy’n defnyddio ynni’n effeithlon er budd y gymuned leol.”
